Transistor Radio: Solomon Ratt (th-dialect)

piyakwâw nikî-kimotin kitohcikan âmaciwîspimowin-Coop-ihk ohci. nikî-itâw nistîs ta-asawâpamât okimâwa ikwa nîtha nikî-sîkowîpinîn kitohcikan nipapakowayânihk ikwa nikî-wathawân atâwikamikohk ohci. mitoni î-kî-nanamipathiki niskâta ispî kâ-nâsipiyân ta-pîhoyân ta-ohpahoyân mistahi-sâkahikanihk isi ita ta-pôsiyân âwatawâsiswâkan ayamihâwi-kiskinwahamâtowikamikohk ta-itohtahikoyâhk. niskâta kî-nanamipathinwa ispî kâ-kapâyân pimithânanihk ohci ikwa kâ-pôsiyân âwatawâsiswâkan. î-kî-itîthihtamân ta-kahcitinikawiyân nikimotowin kitohcikan ohci, mâka namwâc nikî-ohci-kahcitinikawin ikospî nikî-kîmôci-nitohtîn kitohcikan ispî kâ-tipiskâk mihtawakay-nitohcikâkanisa î-âpacihtâyân… Beatles, Cream, Hendrix nikî-mithohtawâwak ikota nikimoti-kitohcikanihk ohci.

ᐱᔭᒁᐤ ᓂᑮ ᑭᒧᑎᐣ ᑭᑐᐦᒋᑲᐣ ᐋᒪᒋᐑᐢᐱᒧᐏᐣ-Coop-ᐃᕽ ᐅᐦᒋ᙮ ᓂᑮ ᐃᑖᐤ ᓂᐢᑏᐢ ᑕ ᐊᓴᐚᐸᒫᐟ ᐅᑭᒫᐘ ᐃᑿ ᓃᖬ ᓂᑮ ᓰᑯᐑᐱᓃᐣ ᑭᑐᐦᒋᑲᐣ ᓂᐸᐸᑯᐘᔮᓂᕽ ᐃᑿ ᓂᑮ ᐘᖬᐚᐣ ᐊᑖᐏᑲᒥᑯᕽ ᐅᐦᒋ᙮ ᒥᑐᓂ ᐄ ᑮ ᓇᓇᒥᐸᖨᑭ ᓂᐢᑳᑕ ᐃᐢᐲ ᑳ ᓈᓯᐱᔮᐣ ᑕ ᐲᐦᐅᔮᐣ ᑕ ᐅᐦᐸᐦᐅᔮᐣ ᒥᐢᑕᐦᐃ ᓵᑲᐦᐃᑲᓂᕽ ᐃᓯ ᐃᑕ ᑕ ᐴᓯᔮᐣ ᐋᐘᑕᐚᓯᔃᑲᐣ ᐊᔭᒥᐦᐋᐏ ᑭᐢᑭᓌᐦᐊᒫᑐᐏᑲᒥᑯᕽ ᑕ ᐃᑐᐦᑕᐦᐃᑯᔮᕽ᙮ ᓂᐢᑳᑕ ᑮ ᓇᓇᒥᐸᖨᓌ ᐃᐢᐲ ᑳ ᑲᐹᔮᐣ ᐱᒥᖭᓇᓂᕽ ᐅᐦᒋ ᐃᑿ ᑳ ᐴᓯᔮᐣ ᐋᐘᑕᐚᓯᔃᑲᐣ᙮ ᐄ ᑮ ᐃᑏᖨᐦᑕᒫᐣ ᑕ ᑲᐦᒋᑎᓂᑲᐏᔮᐣ ᓂᑭᒧᑐᐏᐣ ᑭᑐᐦᒋᑲᐣ ᐅᐦᒋ, ᒫᑲ ᓇᒹᐨ ᓂᑮ ᐅᐦᒋ ᑲᐦᒋᑎᓂᑲᐏᐣ ᐃᑯᐢᐲ ᓂᑮ ᑮᒨᒋ ᓂᑐᐦᑏᐣ ᑭᑐᐦᒋᑲᐣ ᐃᐢᐲ ᑳ ᑎᐱᐢᑳᐠ ᒥᐦᑕᐘᑲᐩ ᓂᑐᐦᒋᑳᑲᓂᓴ ᐄ ᐋᐸᒋᐦᑖᔮᐣ᙮ Beatles, Cream, Hendrix ᓂᑮ ᒥᖪᐦᑕᐚᐘᐠ ᐃᑯᑕ ᓂᑭᒧᑎ ᑭᑐᐦᒋᑲᓂᕽ ᐅᐦᒋ᙮

I stole a transistor radio from the Stanley Mission Coop store once when we were headed back to the Residential School. I told my brother Obie to keep six while I stashed the radio under my shirt and walked out the store. My legs were shaking all the way to the shore of the lake where we were waiting for the plane to take us to the busses waiting in La Ronge. My legs were shaking as I got off the plane and onto the bus. I thought I was going to be caught at any point with my stolen radio, but I wasn’t caught. That year I listened to the radio’s top forty countdown in the dark of night with earphones: Beatles, Cream, Hendrix. Got to love them through my stolen radio. 

Share on facebook
Share on twitter
Share on linkedin

Leave a Reply

Your email address will not be published. Required fields are marked *