Solomon Ratt honours Truth and Reconciliation Day 2025 with this reading – in th-dialect Cree – of his translation of “Mama’s Testament: Truth and Reconciliation.” This is the opening poem of Rosanna Deerchild’s Calling Down the Sky: 10th Anniversary Edition, newly released by Coach House Books. This new edition is fully bilingual in English and Cree, presented in parallel on facing pages: a literal and figurative gesture “restoration” of stolen language, and a reminder of the significance of Cree âhkamêyimowin / persistance: (Follow this link to order directly from Coach House.)
In the video below, Sol interleaves the Cree and English strophes (orally). The Cree text is provided below, so you can listen and read along.
mâmâ otâcimowin: tâpwîwin ikwa wâkôwîcihiwîwin
athisitiniwak tâpitaw nikakwîcimikwak anihi ohpimî-kiskinwahamâtowikamikwa
itê kâ-kî-isi-kwâsihihcik awâsisak tâpiskôc wîthawâw opisiskîwithiwinâwa îtokî
aspin ohci ana môniyâw nîtî ottawa ohci
kâ-kî-itwît î-kî-mihtâtahk
tâpiskôc
kîkway ikota ohci î-kiskîthihtahk
namôtha ikota kî-ayâw namôtha kiskîthihtam
namôtha ikota kî-ayâw
ispî kâ-kî-nohtî-mitho-tôtâkawiyân ispî kâ-kî-mâtoyân
kîkway ayamihikimâw kâ-kî-itôtahk kîkway ayamihikimâskwîwak kâ-kî-itôtahkwâw
namôtha kakî-itwân î-mihtâtaman anihi kîkwaya
kâ-kî-itahkamikahki ikota namôtha wîtha tipîthihtam
wâh-wîhtamok kitâcimowiniwâwa kî-itwîw kîkwây mâka iyako kâ-itwâniwik?
kwâtistakâc ôki wîmistikôsowak omamahtâwi-pîkiskwîwiniwâw
wâh-wîhtamok kitâcimowiniwâwa tâpiskôc ithikohk î-wîhcasinithik
âta wîtha
misawâc kayâs iyako
aspin niyânanomitanaw askîwina iyakwânima niyânanomitanaw askîwina namwâc nânitaw î-itwîyân
itwîwina
kipohtowipathinwa ôta nikohtaskwahk
ita kâ-otihtipitikoyahkwâw ayamihikimâskwîwak ispî kâ-nîhithowîyâhk
tâpiskôc î-otihtinâcik kâ-nipahimiht sîsîpa okohtaskwâthik
î-isi-tâpâtikoyâhkwâw nîkânihk kiskinwahamâtowinihk
î-nîpawiyâhk ikota osâm kinwîsk mitoni î-ati-sikitisoyâhk
mitoni wîpac kikiskîthihtîn, kita-kâmwâtisiyan ikospî ohci, kwâcistakâc
namwâc
nama-wîhkâc nipîkiskwâtînân
namwâc ispî kâwi kâ-kîwîyâhk
namwâc nipîkiskwâtitonân
namwâc âhpô mîna ispî kâ-mîkwâ-ispathik
ohcitaw poko ta-kakwî-wanikiskisiyan ta-nakatanam
âtiht nikî-kaskihtânân
âtiht kiyâpic nikakwî-nakatînân
kapî mâka mâna kimiskâkon kâwi î-kîwîpitikoyan
kâwitha pakwanitaw âcimohkâsok
ikosi mâna nîthanân awâsisak kâ-kî-itikawiyâhk
ispî kâwi kâ-kî-kîwîyâhk kâ-wihtamawâyâhkwâw tânisi kâ-âh-itahkamikwâhk ikota kiskinwahamâtowikamikohk
âhci-poko kâwi nititisahokawinân tahto-askiy
nawac âstamîhk nîthanân nikî-pî-kîwânân
âhci-poko nama-nânitaw kî-itwîwak pîthisk îkâ awasimî î-ihtâyâhk tâpiskôc poko pahkonikîwina
î-sâkaskinîyâhk wanitonâmowi-âkathâsîmowin tipahaskânahcikos ohci î-pîkwatahikâtîki nitoskana kihci-masinahikan ohci î-pîkopitâniwik nitahcahkaninânak
ikwa kâwi nîkinâninâhk
î-pîkopathiki nipowâtamowininâna
nama-nânitaw nisiwanâtan kanakî niyânan askiy oti
ikosi kî-itastîw masinahikîwin kâ-masinahikâtîk nitâcimikosowin ikota ohpimî-kiskinwahamâtowikamikohk
haw opakosîthimow namwâc kimasinahikâson nama-kîkway nôkwan nimihtâtînân
kîkâ-mitâtaht askîwina
ikwathihok isko
ikota nikî-kitîthimikawin
mitoni î-kî-apiscawâsisîwiyân
ispî kâ-kî-pî-nâtikawiyân
nohtâwîpan kî-nakataskîw wanihikîskanahk nikâwîpan kî-nakataskîw
kitohpinâspinîwin-âhkosîwikamikohk
namwâc âhpo nikî-wâpamâwak î-mwayî-naktikoyahkwâw
nama-wîhkâc kihtwâm nikî-wâpamâwak
kîkâ-mitâtaht askîwina kikiskîthihtîn nâ kîkway ikota ohci
kâ-kaskihtamâsoyân
î-kipohtawakiyân piyak nihtawakâhk îkâ î-wâpiyân piyak niskîsikohk
nitocikisin misiwî nistikwânihk niskâta namwâc katawa ispathina nisôkâwâspinân
sôkâwâspinîwin
ita ohci anima kâ-kî-mîciyâhk
cikôci namwâc piyakwâw nikî-wâpahtîn wîhkanôsa
namwâc nikaskihtân ta-nipâyân onipowak niwaspâwîhikwak îh
î-nitotamowicik pônîthihtamâtowin
mâka namwâc ka-kî-pônîthihtîn ikwa
ka-kî-wanikiskisin anima îkâ ka-kî-wîhtaman
namôtha kîkway itwîwin ihtakon ta-wîhtamahk anima kâ-kî-itôtahkwâw nipîkiskwîwininâhk
ta-pîkiskwâtamahk anima tâpiskôc î-pîkopitikawiyâhk nikohtaskwâninâhk ohci
sôniyâw namwâc takî-nanâtawîhowîw ikota ikwa anohc
kîkâc tîpakohpimitanaw nititahtopiponân
ikwa î-nitawîthimiyan kita-âcimostâtân nitâcimisowin
hâw mâka mâkôma
ôta îkâ kâkî-masinahikâtîk
ôta kâ-pîkopathiki masinahikîwina nimiyâmim îkâ wîhkâc kâ-wanikiskisit
2 Responses
Thank you
I can’t speak my language but I’m sure this is beautiful. Thank you for posting this important poem especially on this day.